Los subrevivents del naufragi de Kalamata son a patir un autre calvari: lor internament dins lo camp de refugiats de Malakasa, près d’Atenas, coma se foguèsson encarcerats dins de condicions pietadosas. Mètges sens frontièras (MSF) denóncia que patisson de dificultats per accedir dedins e los ajudar: “A l’ora d’ara, degun i pòt pas intrar e degun ne pòt pas sortir, es doncas impossible de parlar amb eles. Dire que son dins una preson es pas gaire exagerar”.

Las organizacions umanitàrias denóncian lo fach que dins lo camp i a pas de psicològs ni mai de traductors e que las condicions sanitàrias son talas que las címecs, la ronha e los pesolhs s’estendon.

D’autre caire, las familhas dels subrevivents que son dins l’Union Europèa tròban fòrça dificultats per poder determinar se lor parent que cèrcan es dins lo camp.

Lo vaissèl, que portava mai de 700 personas, naufraguèt davant las còstas de Peloponès divendres passat. Segon nòstras darrièras informacions, aurián salvadas 104 personas e recuperats 81 cadavres mentre que contunhava la recèrca dels autres desapareguts.