Los govèrns de l'Union Europèa voldrián autorizar l’espionatge de jornalistas e lors fonts dins la futura Lei de la libertat dels mèdias (EMFA) jos l’escampa de la “seguretat nacionala”, çò denóncia la Federacion Europèa dels Jornalistas (FEP), segon Comunicació21. Per la FEP, seriá un “còp” portat a la libertat de la premsa e aduiriá “d’autres risques encara” als professionals de l’informacion.

Lo 21 de junh, lo Conselh d’Euròpa arribèt a un acòrdi sus l’ÈMFA, una legislacion prepausada per la Comission en setembre de 2022 amb la volontat de luchar contra las interferéncias politicas e la concentracion dels mèdias, e de protegir los jornalistas e lors fonts.

Al començament de junh, França introduguèt una excepcion a l’enebicion generala d’utilizar un logicial d’espionatge contra los jornalistas e lors fonts s'èra per “salvagardar la seguretat nacionala”. Una excepcion compresa dins lo document aprovat pel Conselh.

Per la FEP, aquela excepcion impausada per França daissa sens efièch las proteccions consideradas originàriament e “ignòra” la jurisprudéncia de la Cort de Justícia de l'Union Europèa, dins lo sens que “la sola tòca de salvagardar la seguretat nacionala pòt pas far venir inaplicable lo drech de l'UE”. A mai, la federacion considèra qu’aquò pòt dobrir la pòrta a tota mena d’abuses.

Ara, la FEP  crei ça que la que l’Europarlament poirà modificar la situacion e qu’es possible de salvar la proteccion dels jornalistas e de lors fonts.