Lo conservator Kiriakos Mitsotakis poirà governar Grècia tot sol après ganhar las eleccions legislativas per majoritat absoluda. Los resultats del 21 de mai permetèron pas de formar un govèrn e lo vòte se tornèt far dimenge passat. Alavetz avián ja donada una larga majoritat a Mitsotakis mas ara a obtenguda l’absoluda.

De remarcar qu’en aquelas segondas eleccions la majoritat absoluda èra del 38% dels vòtes; mentre que dins lo vòte de mai passat èra del 45%. A mai, s’es cambiat lo sistèma electoral e lo partit ganhaire,  Nòva Democracia, obten 50 deputats de mai. Aquò a permés a Mitsotakis d’aténher sens problèma la majoritat absoluda.

Mitsotakis s’es felicitat de la victòria e a assegurat qu’ara qu’auriá “un mandat fòrt” per “transformar” lo país. Aital a promeses “de grands cambiaments” dont l’aument dels salaris e la reforma del sistèma sanitari.

Quant a l’esquèrra de Syriza, e mai siá lo segond partit mai votat, arriba pas al 20% dels vòtes. D’un caire, fòrça electors an pas desmembrat que quand èran al govèrn acceptèron lo plan de salvament economica de la tròika de Brussèlas e mai lo pòble aguèsse votat “non” en referendum. S’a aquò i apondèm un escàndol per viòl e abús sexual, sembla qu’a Syriza li costarà de recobrar son electorat.

L’estonament de la jornada es tornarmai l’extrèma drecha. Un partit sonat Espartiatas a trespassat lo lindal del 3% e serà representat al parlament, coma d’autres partits ultradrechistas, Solucion Grèga e Niki (Victòria).