La dissolucion e la persecucion del movement ecologista dels Soslevaments de la Tèrra an fach reagir fòrça mond a la deriva autoritària del govèrn francés. Demest las voses qu’an mostrat lor sosten al movement ecologista podèm soslinhar l’actritz parisenca Marion Cotillard que dimenge o planguèt d’un biais fòrça ferme sus son compte d’Instagram. Cotillard mostrèt son “sosten absolut” al movement illegalizat, denoncièt las violéncias policièras e se demandava qual èran “los vertadièrs criminals”. Aital Cotillard considèra que l’indignacion populara es “naturala” quand “la libertat es en perilh”.

Lo collectiu dels Soslevaments de la Tèrra foguèt dissolgut dimècres passat en Conselh dels ministres après que lo ministe de l’Interior, Gérald Darmanin, aguèt invocada la “legitimacion de mòdes operatòris violents”. Dins los jorns precedents, la polícia francesa arrestèt de desenas de militants ecologistas, probablament per frenar lor capacitat de resisténcia a l’ofensiva governamentala.

D’autras personalitats qu’an manifestat lor sosten al collectiu son la militanta suedesa del clima Greta Thunberg,  la comediana Adèle Haenel, lo cineasta e activista Cyril Dion o la laureata del prèmi Nobel de literatura Annie Ernaux.

Dempuèi la dissolucion del collectiu ecologista, 17 activistas son estats arrestats en de condicions de còps muscladas per la sosdireccion antiterrorista de la polícia judiciària.

 

 

 

 

 

Voir cette publication sur Instagram

 

 

 

 

 

 

 

 

 

 

 

Une publication partagée par @marioncotillard