L’Universitat Occitana de la Guépia (Segalar Roergàs) se debanarà ongan de l’11 al 16 de julhet. Aquesta 22a edicion arriba amb mai de mejans financièrs e umans en tot prepausar un eveniment de tria.

L’Universitat Occitana de la Guépia prepausa un luòc e un temps d’ensenhament, d’animacion, d’estudi, mas es tanben una endevenença mannada de rescontres (e de convèrsas) improbables endacòm mai: los escolans dels corses pòdon parlar tant amb d’occitanofòns “naturals” del vesinat coma amb d’escrivans, d’intellectuals e d’artistas de renom, los vièlhs savis als joves lançats, la cultura sabenta rescontra la cultura populara, los estrangièrs rescontran los del país sus de questions d’istòria e de patrimòni. Tot aquò dins un ambient a l’encòp estudiós e pausadís, amb los pès chimpats dins l’aiga de Viaur e d’Avairon, e amb la consciéncia d’aprestar, en primadièrs, l’avenir del país.

Lo programa prepausa cada jorn de conferéncias, de passejadas, d’aperitius, de corses de lenga, d’estagis de dança, de cant, de violon, d’acordeon diatonic, de ragga, etc.; d’obradors de tenchura vegetala, de cosina lemosina, de escritura... Se projectarà dos filmes, dont lo documentari de Francis Fourcou suls indians osages e son restacament a Occitània. De soslinhar una pèça teatrala de Joan Bodon e un grand balèti.

Mentre que se tendrà l’eveniment, i aurà una exposicion d’instruments ancians de musica rurals redescobèrts e fabricats per de laütièrs del país, e de libres de Fèlix Castanh.

Mai d’entresenhas sus: www.lengaviva.com.