Dins un esfòrç per espandir son vidèopodcast e prepausar a l’audiéncia una segond sason amb de contenguts encara mai rics, la còla de País Invisible a aviada una campanha de micromecenatge esmoventa. La tòca es d’amassar de fonzes per afrontar las despensas d’una segonda temporada amb mai de ressorsas umanas e professionalas, e l’organizacion d’eveniments en dirècte per se connectar dirèctament als auditors.

País Invisible es un videopodcast que cèrca de far conéisser Occitània al public catalan. Produch per l’Associacion per la Difusion d’Occitània en Catalonha, que mena a bon tèrme Jornalet, País Invisible es dirigit e presentat per Zep Armentano amb la collaboracion de Ferriol Macip e David Valls. Dempuèi sa primièra sason es vengut pro popular en tot obténer tres prèmis de prestigi: lo prèmi de joventut de l’Euroregion, lo prèmi Sonòr de la melhora produccion e lo prèmi de la Comunicacion Locala 2023 dins la categoria de melhor contengut àudio.

La campanha de micromecenatge permet als auditors de contribuir financièrament al succès de la seguida del podcast. Aital, per mejan de la plataforma de micromecenatge en linha Tot Suma, los seguidors pòdon realizar de dons per ajudar a finançar los divèrses besonhs de la còla e ganhar de recompensas interessantas. Tanben los grands mecènas que voldràn pairinar una seccion o tot lo programa o pòdon far per mejan d’aquesta campanha.

Un camin de tèrra daissat per d’artistas, de militants, de cantadors, d’istorians e de païsans del país

País Invisible es un format de podcast vidèo prometeire qu’apròcha las distàncias entre los païses catalans e los occitans, en iniciant l’auditor a un viatge sonòr que lo menarà a reconéisser los traches caracteristics de la civilizacion occitana, una cultura amb la quala avèm sovent coexistit sens nos en mainar.

Dins la primièra sason, prepausèron un itinerari de vilas e vilatges de Vielha fins a Turin, en descrivent un camin de tèrra daissat per d’artistas, de militants, de cantadors, d’istorians e de païsans del grand territòri uèi conegut coma lo Miègjorn,  e en tornant bastir pas a pas l’Occitània salvatja d’abans la diglossia pietadosa qu’a fach uèi de l’occitan una lenga en via de disparicion.

D’autres biaisses d’ajudar

Los qu’auràn de mal a jónher la campanha entamenada sul sit de TotSuma.cat pòdon ajudar d’un autre biais.

Demandatz mai d’informacions sus cossí mandar un chèc, cossí far un virament bancari dins los estats francés o espanhòl o cossi sosténer per PayPal a paisinvisibleoccita@gmail.com.