Lo govèrn de Corsega, sonat oficialament "conselh executiu", a alestit lo rapòrt dich Autonomia, que presentarà aqueste 4 de julhet davant l’assemblada deliberativa insulara e qu'establís las grandas linhas de sa proposicion d’un estatut d’autonomia dins la Republica Francesa. Lo document demanda que Corsega siá dotada de capacitats legislativas e que sa singularitat siá inscricha dins la Constitucion, en aprofechant l’emendament que lo president francés, Emmanuel Macron, vòl far aprovar en 2024.

Lo document Autonomia serà presentat pel cap de govèrn de Corsega, Gilles Simeoni, davant los deputats còrses, amb l’esperança d’obténer un sosten majoritari a l’Assemblada de Corsega. Simeoni espèra que, a mai dels 32 deputats de son partit Femu a Corsica (Fagam Corsega) —qu’a la majoritat absoluda—, i vòten tanben en favor los autonomistas del Partit de la Nacion Còrsa (PNC), dins l’oposicion, que presentaràn lors pròprias proposicions. Es pas probable que la drecha nacionalista francesa —que vòl solament una capacitat d’adaptacion de las leis francesas— jonga la proposicion. I a mai de dobtes sus la posicion dels independentistas de Core in Fronte (Còr endavant): escartan pas de sosténer la demanda d’estatut, mas son pas dispausats a validar un document que preveja pas una autonomia significativa.

Lo govèrn que lo presidís Simeoni a tengut de reünions, aquestes darrièrs jorns, amb lo PNC e Core in Fronte per ensajar d’avançar devèrs un consens e far una redaccion comuna finala del document aprovat a l’Assemblada. Simeoni vòl que lo document obtenga un sosten majoritari de l’Assemblada còrsa per aver mai de fòrça davant lo govèrn francés e lo president de la Republica. De fach, al començament de junh, lo ministre de l’Interior francés, Gérald Darmarin, diguèt qu’èra prèst per discutir quina proposicion que foguèsse que sorgiguèsse de Corsega, se beneficiava de l’aprobacion d’una deliberacion de l’assemblada insulara. S’espèra que Macron farà qualque mençon de l’afar dins son discors del 14 de julhet, jornada nacionala francesa.

La draia que Simeoni defend per obténer l’autonomia legislativa es que s’aponda a la Constitucion un nòu títol exclusiu per Corsega, coma se passa a l'ora d'ara amb d’autres territòris coma la Nòva Caledònia. A l'ora d'ara, Corsega a una autonomia executiva, mas non pòt pas aprovar de leis.

Los tèrmes concrets d’aquela autonomia, totun, deuràn èsser la tòca d’una negociacion —que se prevei complicada— entre los representants còrses e franceses. I a discordància en d’aspèctes clau, coma la creacion d’un ciutadanatge còrs o la cooficialitat de la lenga còrsa.

Aquesta nòva es adaptada de Nationalia amb qui Jornalet ten un acòrdi de cooperacion.