En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, retrobam l’entrevista de Benaset Dazéas, director del Congrès Permanent de la Lenga Occitana que presenta lo nòu sit del Dicodòc, lo diccionari en linha de la lenga occitana, qu’es encara mai rapid e foncional.

Es l’aplicacion numèro un del Congrès e fa sang nòva. Onze ans après son lançament, lo Dicodòc, qu’a ajudat un bon nombre d’escolans, d’estudiants e de salariats del monde occitanofòn, dispausa d’ara enlà de son sit internet pròpri. I recampa 470 000 intradas e 2,2 millions de formas conjugadas. S’i pòt tanben trobar de toponims, de tèrmes especializats e tot un fais de ressorsas novèlas per trapar lo mot que cal. Benaset Dazéas, director del Congrès, nos a explicat lo perqué d’aquela mudacion.