Lo president de l’estat francés, Emmanuel Macron, a remandada sa vesita en Alemanha que deviá començar ièr dimenge. O a fach a causa de las susmautas que se tenon per tot l’estat en seguida del murtre del jove Nahel per un policièr.

L’ajornament de la vesita l’a anonciat l’ofici de la presidéncia alemanda dins un comunicat. De son caire, l’Elisi a comunicat: “A causa de la situacion intèrna, lo president de la Republica a indicat que vòl demorar en França pendent los jorns que venon. Per tant, totes dos presidents se son acordats per ajornar la vesita en Alemanha a una data ulteriora”. La vesita de Macron se deviá perlongar fins a dimars.

Dissabre e dimenge, la polícia francesa procediguèt a mai de 200 detencions dins de jornadas de protèstas que s'estendèron per tot l’estat, dont en Occitània e mai que mai a Marselha, mas tanben en Belgica, l’illa de la Reünion e Guaiana. De remarcar que s’es parlat de supausats tirs d’armas de fuòc a Nimes e Lion, çò rapòrta Le Figaro.