La justícia a emés son vejaire sul cas dels 55 dalhaires volontaris qu’en novembre de 2021 esventrèron de sacas de “semens OGM” dins un entrepaus roergat. Los an condemnats totes a de multas de 200 èuros sens ajornaments e tanben a pagar al cerealièr roergàs 6566 èuros  per damatges, 1000 èuros per prejudici moral e enfin 1500 pels còstes dels avocats. Almens los an relaxats de las acusacions de panatòri, çò rapòrta Reporterre.

A la debuta del procès èran perseguits 28 dalhaires pel tribunal correccional de Rodés. Mas al començament de junh, una vintena de simpatizants se presentèt espontanèament en demandant a èsser jutjats al meteis títol que los autres.

La dalhaira volontària Christine Thelen se declarèt “mitigada” als jornalistas de France 3: “Aquel jorn, faguèrem un acte de desobesissença civila e un acte ciutadan. Èrem venguts far una inspeccion ciutadana per denonciar lo fach que la RAGT contunha de cultivar de plantas modificadas geneticament que resistisson als erbicidas. Volèm pas pus de pesticidas. La gent n’es malauta. Los enfants son malauts. La natura es malauta. La jutgessa a pas entendut aquel argument. Soi decebuda qu'aja pas agut lo coratge de protegir la societat. Es pasmens lo ròtle de la justícia”.

De soslinhar que demest los acusats i aviá lo jornalista Grégoire Souchay qu’es estat relaxat. Lo jorn dels faches se trobava aquí per reportar l’eveniment per Reporterre, Libération e L’Éveil de Lozère.