Los Dragons Catalans jogavan los darrièrs, dissabte de vèspre. Sabián ja que, dijòus de ser, Leeds èra anat batre los segonds, los Lops de Warrington: 22-6.

Un divendres mai classic amb las victòrias a domicili de Wigan (22-6 tanben fàcia a Huddersfield), Saint Helens (22-0 fàcia a Castleford), Leigh (34-4 fàcia a Hull KR), una segonda victòria de la temporada per Wakefield (32-6 fàcia a Salford).

Una victòria cò d’Hull FC balhariá 4 punts d’avança als Sang e Aur en cap de classament sus Warrington e Leigh.

Las causas comencèron del melhor pels catalans:

• 3a minuta, còp de pè de seguir; 21n ensag de la sason per Johnstone, transformacion de Morgue: 6-0.
• 19a: balon perdut per Hull, ensag de Davies, transformacion de Morgue: 12-0.
• 31a: Hull marca pel pilar tongan Satae que portarà l’an que ven las colors catalanas: 12-6.
• 33a: Romano marca en posicion de mièg de tengut: 16-6.
• 35a: lo pilar Bosquet es placat sul postèl, capita de marcar al pè. Morgue transforma: 22-6.
• dins las darrièras 5 minutas, los angleses marcan dos ensages transformats per tornar a 18-22.

Lo segond temps serà d’una granda intensitat. Las defensas viran fortalesas. Lo dobertura dels Dragons tusta a seguir dins l’esquina de la defensa d’Hull e Tom Davies marca son segond ensag de la partida e Morgue passa sa quatrena transformacion de la vesprada. Victòria catalana: 28-18, la setena en seguida. De confirmar tre aqueste dissabte 8 de julh a Brutus amb la recepcion d’Huddersfield.

Lo XIII es un jòc d’ataca: solament sèt penalitats de fiuladas dins la partida: 3 contra los catalans, 4 contra los angleses!

Lo TO en segonda plaça

En Championship, lo Tolosa Olimpic s’installa a la segonda plaça. Aqueste còp, son los Vikings de Widnes que patiguèron del vam occitan: los Blau e Blanc menan 24-8 a la pausa e sèrvan l’avantatge dins lo segond temps: 40-28. Una cinquena victòria de tira!

En rason de la Copa del Mond dels cosins quinzistas, lo club se va trapar interdit d’estadi Ernèst Wallon per tres partidas: fàcia a Swinton, lo 19 d’agost; a Barrow, lo 26 d’agost e la partida fàcia al cap de fila Featherstone lo 16 de setembre. Lo club anonciarà lèu lo nom dels tres estadis ont jogaràn aquestas partidas.

Federacion: demission del president

Quauques setmanas aprèp un vòte de fisança en seguida l’anóncia de la non-organizacion de las Copas del Mond de XIII de 2025 en França, lo president de la Federacion Luc Lacòsta a anonciat sa demission de sa foncion presidenciala per rason de santat. Lo secretari general Domenge Balop assegura l’interim abans un vòte qu’intervendrà lo 9 de setembre venent.

NRL: de Vaquièrs eficaces

En Austràlia, la 18a jornada a vist de partidas desequilibradas: 74-0 pels Vaquièrs fàcia als Tigres; 66-0 per Newcastle fàcia als Dògols; 52-16 per las Làmias fàcia als Dragons; los Lapinons ganhan en Nòva Zelanda: 28-6; Penrith va batre Melbourne: 34-16.

Mai sarrat foguèt lo dèrbi de Brisbane ganhat pels Cavals Fòls fàcia als Dalfins: 24-16. Canberra bat los Titans: 26-22. Mercé a dos ensages del mesclanha Cherryl-Evans, Manly bat los Polets: 18-16.