Dempuèi 47 ans se ten a Nimes l’Universitat Occitana d’Estiu, un rendètz-vos estival a l’entorn de l’actualitat dels sabers, del debat d’idèas e del rencontre cultural. Ongan, l’eveniment aurà luòc del 7 a l’11 de julhet e serà consagrat a las politicas lingüisticas jos la devisa “Vira la lenga”.

La conferéncia inaugurala la farà Michel Feltin Palas, lo conegut jornalista, cap-redactor de L’Express e activista per las lengas minorizadas. Seguirà un programa de tria tot cargat de conferéncias, estagis, obradors, cafès literaris, passacarrièras, concèrts... mas tanben de moments de convivialitat.

L’eveniment se poirà tanplan seguir sus Ràdio Lenga d’Òc qu’aurà un platèu sus plaça d’ont s’emetrà cada miègjorn lo Miègjornau en dirècte.

L’Universitat Occitana d’Estiu de Nimes es organizada per la Maison per l’Animacion e la Recèrca Populara d’Occitània (MARPÒC) que fa partida de l’IEO de Gard. Ten lo sosten del CIRDÒC.

Lo programa complet es sus la pagina d’acuèlh de la MARPÒC. Per mai d’entresenhas, per las inscripcions e reservacions d’albergament, podètz escriure a marpoc30@gmail...

Retrospectiva sus Robèrt Lafont

Dins lo quadre d’aquela Universitat Occitana d'Estiu, se tendrà dimenge 9 de julhet una retrospectiva sus Robèrt Lafont amb la participacion de Felip Martèl sus l'òbra literària de l’autor, e puèi una taula redonda amb Gerard Tautil e Joan Lois Escafit sus l'accion e los escriches politics del teorician de l'occitanisme contemporanèu, que la moderarà lo jornalista Clamenç Pech.