Lo diluns 03 de julh de 2023, los CM2 de las Calandretas de Barbacana e Miquèl Decòr se rendèron al collègi del Bastion e dos autres al collègi Varsovie.

Aguèron aquí l’escasença de viure una jornada d’integracion cap a lor futura dintrada en seisena.

Foguèron totes despartits sus sèt classas, per òrdre alfabetic. D’unes avián un pauc paur perque èran pas amb totes sos companhs, mas fin finala tot se passèt plan e tot lo monde se regalèt.

Rescontrèron d’unes professors, que totes foguèron fòrça agradius.

Sus mantunes temps, los grops faguèron d’arts, de musica o de jòcs en anglés.

Posquèron totes visitar lo collègi, qu’es grandassàs e plan esquipat.

Los professors nos presentèron lo reglament interior que recampa los dreits, mas tanben los devers de cada collegian (respècte de cadun e dels oraris, lo comportament de téner, lo trabalh de far, etc).

Aprèp una bona matinada de trabalh, aguèrem lo plaser de descobrir lo “self”. Per i accedir, traversèrem lo tunèl per ganhar lo bastiment B. A l’arribada prenèm son platèu e podèm causir son entrada, son produch lachièr e son dessèrt. En aquel jorn, i aviá pas de causida pel plat principal, mas de costuma, ne prepausan. Vist que i a sièis cents collegians en temps normal, avèm gaire de temps per manjar: pas que vint minutas! Ça que la, èra equilibrat e gostós! A la fin del repais, cadun recaptèt son platèu en pensant plan de trigar sos gastes, reciclables o non.

Aprèp lo repais, aguèrem una longa recreança dins la cort A.

A catòrze oras, totes los grops aprofechèron d’una ora de metodologia, per aprene a aprene e comprene cossí fonciona lo cirvèl.

A quinze oras, la campana tindèt e nos encaminèrem a pè cap a l’escòla. Foguèt una polida passejada de quatre quilomètres!

Aquela jornada nos permetèt de pausar totas las questions qu’aviám e d’apasimar las crentas de cadun abans lo grand saut al collègi.

Ara sèm totes rassegurats e nos tarda la dintrada!

Tenèm de grandmercejar lo principal del Bastion, lo Sénher Andrés Sousa, qu’organizèt aquela jornada, tant coma los professors que nos aculhiguèron.

La còla dels CM2
de las Calandretas de Carcassona

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…