Actualitats
Pel president d’Azerbaitjan França es lo representant màger del neocolonialisme
Se presenta, segon el, “coma defensora de la minoritat armènia”, mentre “qu’enebís la lenga còrsa e non accèpta pas lo concèpte de minoritats etnicas”
Tèxte legit
Lo president d’Azerbaitjan, İlham Əliyev, demanda als estats del Movement dels Non-Alinhats que combaten lo neocolonialisme en mençonant França coma son representant màger. D’efièch, Əliyev tenguèt de prepauses fòrça durs contra l’estat francés que l’acusa lo cap d’estat de racisme, de genocidis e d’ingeréncias dins los afars d’autres païses. A mai, lo president azèri condemnèt lo sosten de París al “separatisme armèni” dins lo Naut Karabakh en tot afirmar que França se presenta “coma defensora de la minoritat armènia”, mentre “qu’enebís la lenga còrsa e non accèpta pas lo concèpte de minoritats etnicas”.
Əliyev s’adreiçava als participants de la reünion ministeriala de la Coordenacion del Movement dels Non-Alinhats qu’alestisson la cima que se tendrà en Oganda en genièr de 2024. Aquí, lo dirigent azèri exprimiguèt als membres de govèrns presents son chepic per “l’islamofobia e la xenofobia dins lo Mond” e remembrèt l’afar de Nahel, l’adolescent que son murtre per un policièr dins la banlèga de País entraïnèt de susmautas dins tot l’estat francés.
Enfin, per clavar son discors de benvenguda als ministres diguèt que “lo Movement dels Non-Alinhats, creat coma resultat del procès de descolonizacion, deu luchar amb determinacion contra aquel vergonhable legat del passat e contribuir a sa totala eradicacion”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Vergonhós aunèstament qu'agitz colportat la propaganda d'un dictator genocidari coma Aliyev. Soi decebut de Jornalet.
Se la politica francesa es cèrtas pas exemplària en la matèria, avèm mai un exemple de l'usatge de l'argument "decolonial" per una dictator que vòl se donar una contenença morala. Potin, son mèstre, fa çò meteis per justificar son "eurasisme" anti occidental, mentre que la Federacion de Russia es benlèu un dels darrièrs grands empèris colonials del sègle XVIII-XIX. Veire per ex. la Guèrra del Caucàs (1817-1864), a metre sul meteis plan que la colonizacion francesa de l'Africa del nòrd, atanben, la guèrra de Checheniya de 2001 èra pas tan diferenta de la guèrra d'Argéria pels franceses, salvat qu'es estat considerat un afar "intern" pels organismes internacionals, per error a mon vejaire, vesèm uèi la resulta.
Coma sempre, s'es pas faus que França es vuei un representent fòrça important de l'imperialisme e dau colonialisme dins lo monde (emai se n'es pas lo màger, a costat deis Estats Units per exemple), aqueu l'emplega coma biais d'escafar son imperialisme pròpri. Despuei un sègle, Turquia coma Azerbaïjan son dins una lucha permanenta per destrurre la populacion armeniana. E Aliyev es vuei lo mai actiu dins aqueste projècte. La guèrra de 2019 fuguèt l'ocasion d'escafar encara mai tota traça de la populacion armeniana dins una partida màger d'Artsakh.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari