Cucunhan, entre molin e castèl de Queribús, serà l’encastre d’una novèla Fèsta del Conte del dimars 18 al dijòus 20 de julh. Lo festenal s’acabarà en país catalan lo divendres 21 a Talteüll. La manifestacion fa la part bèla a las lengas occitana e catalana, amb un perlongament ongan cap al creòl de las Antilhas.

Un sermon coma l’abat Martin…

La manifestacion se dobrirà aqueste dimars 18 de julh à 15h, amb lo tradicional concors de sermon, en omenatge al personatge mai conegut, mercé a Romanilha e Aquiles Mir, del vilatge: lo curat de Cucunhan. Candidatas e candidats an dètz minutas per sedusir l’auditòri (se marcar per i prene part: +33(0)6 88 62 22 00).

Tres bravas seradas

En serada, sul còp de 9 oras, jol tibanèl, poiretz escotar, lo dimars 18, Florant Mercadièr que sortirà de contes del placard entre los remembres de la familha roergassa, las ombras de Joan Bodon e de Padena e la vida fadurla de Tolosa. Dimècres de ser, Elena Bardòt s’inspirarà de contes occitans e d’endacòm mai per vos faire viatjar sus las alas dels aucèls. Dijòus, Valer’Egouy, que ven de Martinica, montarà sus l’empont. Dins sas paraulas, restontisson las sonoritats creòlas dels personatges sieus, portaires d’una granda set d’umanitat.

La paraula senhoreja…

Las jornadas son ricas en moments d’escota e de rescontres per carrièras, sus las plaças, dins los òrts, la glèisa o las salas del vilatge. Kamel Guenoun balharà una conferéncia sus las originas e lo devenir du conte. Patric Erard e Bruno Sabalat diràn lor amor del país. Maria Gaspa e Isabèla François, las comedianas del Teatre de las Originas, presentaràn la conferéncia borlesca "Sant Joan tot l’an!". Amb La fratrie de Pitou, Wilfried Delahaie e Olivier Martinez vos menaràn dins un viatge musical e contat al còr de la comunautat gitana. Seguiretz Elèna Bardòt dins una passejada contada per carrièras e carrieretas del vilatge. Veronica & Babeta, las cavilhas mèstras de la manifestacion, animaràn un penequet coquin. Laurent Batist ramentarà l’importància fondamentala del vin.

Prenètz la paraula…

E vos? Coneissètz de contes, aquò vos tafura de rescontrar un auditòri: anem, i cal anar! A 6 e mièja del vèspre, al moment dels aperitius contats (e plan pagats: un conte e glop!, un veire de vin d’un productor local!)

De moments de scèna dobèrta son tanben previstes per alargar lo viatge de las paraulas e dels imaginaris.

Los pichons participan…

Las vespradas del dimècres e del dijòus, d’activitats son previstas pels mainatges. Poiràn furgar dins lo forra-borra de Bruno que recupèra de tot: amb de quicòm, se pòt faire de daquòsses! Seguiràn un espectacle de mariòtas. Escotaràn las contairas de Cucunhan o Alan Roch que los farà seguir las bèstias (lop, rainal, pol, cabra, etc.) tan presentas dins los contes. Poiràn prene la paraula al moment de l’espertinar contat: un conte e zop!, un veire de siròp o de chuc de frucha a churlupar!

Escapada catalana

Divendres 21, la Fèsta del Conte se clavarà en Catalonha Nòrd: a Talteüll, lo brèç dels primièrs europèus. A 5 oras del vèspre, Olivièr de Robèrt aurà una carta blanca de jogar. A 6 e mièja, seguirà un aperitiu musical. En serada, lo grop rosselhonés Llamp-te-Friguipresentarà son recital electrofòlc catalan. E cric e crac, l’article es acabat!

Totas las entresenhas (oraris, tarifas, abonaments, etc.) sus www.contoirduconte.fr