Un jorn, al Conselh de la Classa, nòstra regenta pren la paraula: prepausa un projècte, qu’es de crear una cançon sul tèma de Carnaval. Anàvem trabalhar amb lo grop Revelhet, dins l’encastre d’un projècte “PEC_CO” (complicat!), d’en primièr per aprene lor cançon Carnaval e ensajar de cantar en polifonia. Lo grop de musica Revelhet venguèt per nos far far d’exercicis.

Un jorn, Pascala nos a enregistrats: nos caliá improvisar de melodias gaujosas. E Pascala botèt las melhoras amassa. En mai, cerquèrem de mots, d’adjectius sul tèma, e après comencèrem de frasas. E amb tot aquò, Pascala Respaud e Ramón Gargallo nos an creat la cançon! Faguèrem sonque qualques pichons cambiaments de mots per facilitar la prononciacion.

La cantèrem pel primièr còp en public al Total Festum de Palhèrs (17 de junh), puèi al Total Festum de Montbrun (24 de junh) e nos sembla qu’agradèt al public.

Aquí nòstre “Carnavalet Reggae”:

Jutjat, copat,
Carnaval se crèma
Penjat o negat,
Amolonam criticas,
Jutjat, copat,
Carnaval se crèma
Penjat o negat,
Avèm lèu acabat.

            Repic:
                        Manjam d’aurelhetas
                        E pro de bonbons,
                        Car-na-val
                        Fasèm de bestiesas,
                        Manjam d’aurelhetas
                        E pro de bonbons,
                        Car-na-val
                        Qu’avèm rendetz-vos!

Fèsta, fèsta,
Que fasèm la fèsta
Totes reünits
La musica qu’es prèsta,
Fèsta, fèsta,
Que fasèm la fèsta
Polit serpentin
De rires e de crits.
 

            Repic:
                        Dança, dança
                        Carnaval que dança
                        Totes travestits
                        La farandòla cansa,
                        Dança, dança,
                        Carnaval que dança,
                        Carnaval partit,
                        Pluèja de confètis.
 

Los calandrons de CE2, CM1, CM2
de la calandreta de Pàmias (mai de 2023)

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…