La Cort Suprèma de Suècia a anonciat que blocava l’extradicion de doas personas reclamadas per Turquia per lor ròtle presumit dins la temptativa de còp d’estat de 2016, del qual moriguèron gaireben 250 personas.

Los jutges an explicat dins un comunicat que totes dos son acusats en Turquia de far partida d’una “organizacion terrorista” per aver de ligams amb l’organizacion dirigida pel clèrgue islamista Fethullah Gülen, que viu en exili als Estats Units e que l’acusa Ankara d’aver organizada la temptativa de putsch. “Un de las requeréncias prèvias per l’extradicion es que lo fach sul qual se basa per la demanda d’extradicion siá punible tant en Turquia coma en Suècia”,çò a soslinhat lo tribunal, qu’a mes l’accent sul fach que “la requeréncia de dobla criminalitada deu èsser aplicada de manièra particularament estricta en cèrtas situacions”.

La decision s’es presa qualques jorns après que lo president turc, Recep Tayyip Erdoğan, levèt son vèto a l’adesion de Suècia a l’OTAN, blocada jos l’escampa de manca de collaboracion en matèria antiterrorista.