En collaboracion amb Ràdio Occitània, Jornalet prepausa cada dimenge un àudio del podcast de la ràdio tolosana. Aquesta setmana, retrobam l’entrevista d’Eva Cassagnet a prepaus de la sèria Lo Banc, que se pòt agachar dempuèi diluns passat sus Òc Tèle e sus TV7.

Al començament èra un pitch: Alienòr e Margalida son doas acostumadas d’un banc que senhoreja dins un vilatjon gascon. Caduna d’entre elas s’assèta totjorn a la meteissa plaça. Comentan las causòtas de la vida vidanta, constitutivas d’una vida… Aquò es lo resumit de la sèria Lo Banc fargada per Riddim Production e Òc Tèle. Ven de sortir sul sit de la television occitana sul web un primièr episòdi entitolat “Lo textòt”. Sèm tornats cap a l’autora Eva Cassanhet que nos a contat la genèsi d’aquela sèria.