A mal capitat un projècte d’illa flotanta ecologica sus la còsta de Mandaluec la Napola (Vencenc) a causa de disputas politicas. Lo projècte, apelat Canua Island, consistissiá en una plataforma de 1750 m² plaçada sus un trimaran motorizat, e lo sosteniá la comuna. En mai d’aquò, complissiá totas las requeréncias e èra estat realizat mai d’un còp explicat. Pasmens,  lo projècte a pas obtenguts los permeses que caliá per èsser menat a bon tèrme. Segon los creators del projècte, lor an dich net e clar qu’esperèsson pas cap d’autorizacion aqueste estiu.

Renaud Muselier, lo president de la region dicha Provença-Alps-Còsta-d'Azur, qu’ara se presenta publicament coma “Region Sud”, seriá estat un dels principals opausants a Canua Island. Lo senator Henri Leroy, ancian cònsol màger de Mandaluec la Napola, acusava lo govèrn francés d’arrestar lo projècte a la demanda de Muselier, segon çò que disiá dins un e-mail que mandèt a la primièra ministra Elisabeth Borne. Los creators de Canua Island afirman que son victimas d'una “vendetta politica”.

Lo Secretariat d'Estat de la Mar assegura que lo desvolopament d'illas artificialas es pas compatible amb la proteccion de l’environament. Mas lo projècte aviá per tòca de prepausar d'installacions ecologicas, en inclusent un restaurant, un bar, una piscina d'aiga doça e d’airals de repaus. Los promotors afirman que Canua Island seriá una innovacion mondiala e que se destacava son apròchi ecoresponsable amb de caracteristicas coma lo tractament d'aigas residualas e l'emplec de biocombustibles faches amb d'òli de cosina reciclat.

Malgrat l’investiment d'aperaquí 16 milions d'èuros e la classificacion del projècte coma vaissèl de passatgièrs, Canua Island a pas obtenguts los permeses. La societat a assabentat sa centena de salariats que lo projècte podiá pas contunhar.