De desenas de milièrs de personas manifestèron durant la dimenjada passada dins las vilas màgers de l’estat d’Israèl per una 28a jornada de protèstas nombrosas contra la controversiada reforma judiciària prepausada pel primièr ministre Benjamin Netanyahu e que donariá al govèrn un contraròtle dels jutges. Los manifestants asseguran que la reforma afectariá l'equilibri dels poders e la democracia del país. Tel Aviv foguèt l'epicentre de las manifestacions, mas i aguèt tanben de protèstas dins d'autras localitats importantas.

Malgrat la pression dels manifestants e l'oposicion politica, Netanyahu a pas retirada la proposicion. Recentament, una partida de la lei foguèt aprovada, çò qu’evita que los tribunals pòscan metre en question las accions del govèrn. Aquò a menats los organizaires de las manifestacions a convocar a una Jornada de la Resisténcia per deman, 18 de julhet, e prometon una setmana de resisténcias civilas e desobesisença a la reforma judiciària.

A mai de crénher que la reforma afeblisca lo sistèma democratic, los manifestants acusan Netanyahu de voler escapar a la justícia per d’afars de corrupcion que lo pertòcan.

Netanyahu foguèt espitalizat dimenge per desidratacion.