Los Dragons avián plan a se faire perdonar aprèp la desfaita pietadosa fàcia als Gigants d’Huddersfield. Dijòus de ser, a St Helens, Kreighan dobrissiá la marca sus penalitat, puèi recuperava un còp de pè a seguir anglés just davant la linha, transmetiá la palma a Johnstone que filava long de la tòca per marcar l’ensag 95 mètres mai luènh. Lo centre transformava. A la 36a, un còp de pè del mesclanha dins l’esquina de la defensa catalana permetiá a Percival de marcar l’ensag. A la pausa, los Dragons menavan 8-6.

Tre la represa, Ikavalu teniá cap a tres defensors e capitava de se revirar per marcar un ensag que Kreighan transformava. E aquí calguèt téner còp ! Fins a la 73a minuta, ont l’ataca anglesa capitèt de marcar l’ensag per un retorn a 12-14. A la darrièra segonda, St Helens aviá un dos contra un a jogar sus l’ala, mas lo jogaire en posicion d’alièr crosava sa corsa e lo centre mandava la pauma directament en tòca ! Los catalans avián plan ganhada la partida: 14-12!

Los rescontres de divendres vegèron las victòrias d’Huddersfield fàcia a Wakefield (34-6) e de Wigan fàcia a Warrington: 26-12 alara qu’Hull KR s’impausava d’un punt a Leeds: 19-18. Dissabte, Hull-FC bat Castleford: 36-18.

En ganhant 24-22 a Salford, Leigh demòra segond a 2 punts dels catalans. Aquesta dimenjada, plaça a las mièjas finalas de la Cup: dissabte, Leigh reçauprà Saint Helens e dimenge Wigan se gandirà cò d’Hull KR.

Tolosa en segonda posicion

En Championship, aprèp una desfaita susprenenta a Londres, Tolosa recebiá los Dògols de Batley. Lo primièr temps èra equilibrat (12-12), mas los occitans fasián puèi la diferéncia (34-12) per tornar prene la segonda plaça al classament de la competicion. Tolosa aurà l’escasença de confirmar aquesta plaça amb la recepcion de Keighley lo dissabte 29 de julh.

Los joves son portaires d’espèr

Aqueste dissabte, l’esquipa de França de U17 jogava una primièra partida contra son omològa anglesa sus la pelena de Warrington. Los Blavets menavan 14-6 a la pausa, puèi resistissián al retorn anglés per s’impausar 26-14. Una segonda partida serà jogada aqueste dimècres 19. Los joves franceses son determinats a confirmar aquela primièra victòria.

Austràlia: Los Blaus ganhan la tresena partida

Alara que Queensland aviá ganhadas las primièras 2 partidas e doncas l’edicion 2023 de l’State of Origine, dins la tresena partida, a Sydney, la formacion de Nòva Galas del Sud mostrava un visatge mai solidari e mai actiu per faire plegar l’adversari: 24-10.

En campionat, divendres, Newcastle dominava los Tigres: 34-18. La jornada de dissabte èra favorabla als vesitaires: victòrias de Melbourne cò dels Polets 30-16 , de Brisbane cò dels Dògols 44-14 e dels Vaquièrs cò de Manly 19-8. Dimenge, los neozelandeses dominan las Làmias: 44-12; las Anguialas baton los Titans 25-24 e, en bons primièrs, Penrith va ganhar cò dels Tigres: 24-14.