Acusan las autoritats tunisianas d’expulsar de migrants dins lo desèrt. A l’endeman de la signatura d'un acòrdi bilateral entre Tunisia e l'Union Europèa per de questions d'immigracion, amb una ajuda financièra de 900 milions d'èuros, an trobat un grop de migrants abandonats en plen desèrt de Libia, jos de temperaturas de 45^oC e sens aiga ni manjar.

Los migrants, que cèrcan d’arribar en Euròpa del nòrd d'Africa estant, son estats remandats amb violéncia per las autoritats tunisianas e abandonats dins una zòna desertica de Libia, près de la frontièra amb Tunisia. Los migrants an denonciat d’èsser estats tabasats e quitament fusilhats per la polícia tunisiana. Los an retrobats de gardas frontalièrs libians.

Libia es totjorn objècte d'acusacions repetidas de violacions dels dreches dels migrants, e fòrça d’aquestes ensajan de fugir la violéncia policièra. En aqueste cas, las autoritats libianas an afirmat que lo salvament se faguèt amb la collaboracion de l'Organizacion Internacionala per las Migracions (OIM), que lor a porgit de manjar, de ròba e un refugi temporari.

Es important de soslinhar que Tunisia èra considerada coma un pòrt relativament segur pels migrants, mas qu’ara sembla de començar una politica de persecucion e d’atacs contra eles.  De fach, lo president tunisian, Qais Saied, a aumentada la repression envèrs los dissidents politics e a criminalizats los migrants subsaharians.

Tot aquò se passa just après la signatura d'un acòrdi entre l'Union Europèa e Tunisia per combatre la migracion irregulara, refortir los contraròtles frontalièrs e luchar contra lo trafec de las personas. L'acòrdi implica una ajuda financièra de 900 milions d'èuros per Tunisia e a tanben a per tòca de promòure la transicion devèrs l'energia verda e d’ajudar a las finanças estatalas.