Lo Reialme Unit a aprovada una nòva lei de las frontièras. En consequéncia es arribat al pòrt de Dorset, dins l’illa de Portland, un vaissèl preson dich Bibby Stockholm que lotjarà 500 demandaires d’asil mentre que s’examina lor situacion administrativa dins lo reialme. D’organizacions umanitàrias e d’associacions de l’illa an protestat.

Lo govèrn britanic justifica la decision d’embarrar los refugiats dins aquela nau coma un biais de far d’estalvis, pr’amor que l’aculhença de refugiats a agut fins ara un còst de cinc milions de liuras esterlinas per jorn segon lo Ministèri de l’Interior. Lo naviri ten 250 cambras doblas.

En mai de l’oposicion de las organizacions umanitàrias, un parlamentari conservator de la circonscripcion de Dorset s’es tanben opausat a l’iniciativa, amb los arguments que s’es pas demandada l’opinion dels abitants e que metre los refugiats dins una nau es pas la solucion adeqüata.

Aquel vaissèl preson e la deportacion devèrs Rwanda dels migrants qu’arriban al Reialme Unit per la Marga fan partida dels plans del govèrn per empachar l’intrada de migrants sens papièrs. S’espèra que la nòva lei de las frontièras recépia lo consentiment reial per intrar en vigor.

Mentretant, sabèm pas dins quant de temps lo vaissèl serà complet e se n’i aurà d’autres.

Las chifras oficialas desmentisson l’idèa que lo Reialme Unit patisca una “autentica invasion de refugiats”, pr’amor que las arribadas son estadas relativament modèstas en comparason amb d’autres estats europèus. Lo govèrn a tanben de plans per lotjar los demandaires d’asil en d’autres endreches, coma dins de basas militaras non utilizadas, per reduire los còstes d’ostalariá.