Lo 1r d’agost, la tarifa d’electricitat garentida per l’estat francés aumentarà del 10 %, çò que representa un subrecòst d’aperaquí 160 euros per an. Aquela pojada s’aplicarà egalament als comerçants, artisans e petitas entrepresas que lor consum es inferior a 36 kVA, çò rapòrta Reporterre.

Lo govern francés aviá ja anonciada la fin progressiva del bloquièr tarifari sus l’electricitat d’aicí a la fin de 2024, çò que suscita de criticas de l’associacion de consumaires UFC-Que choisir, que considèra aquela decision coma un “vertadièr escàndol”. Lo bloquièr tarifari foguèt instaurat en febrièr de 2022 amb la promessa que l’auça dels prèses de l’electricitat seriá limitada al 15 % en 2023, una promessa qu’es desenant pas tenguda. UFC-Que choisir reclama lo mantenement de la limitacion de la tarifa reglamentada fins a l’acabada de l’annada.

De son caire, lo deputat ecologista Nicolas Thierry prepausa un bloquièr tarifari alternatiu, qu’ofrisca un prètz protegit jos un certan lindal de consum e que tarife la rèsta al prètz del mercat. “D’ajudar del meteis biais un fogal que dispausa d’una piscina e un autre que passa l’estiu dins un apartament exigú a pas cap de sens”, çò a dich.