Lo país luishonés es a mand de celebrar la Hèsta Gascona 2023 del 13 al 15 d’agost a Banhèras de Luishon. Pendent tres jorns, la cultura occitana serà a l’onor, amb per tèma central d’aquela annada“la cosina regionala”.

L’eveniment prepausa un programa ric en activitats culturalas e culinàrias. Lo salon Libraria Viva somondrà de conferéncias e d’exposicions al complèxe del casino tre 10h fins a 18h lo 13 d’agost.

Lo ponch culminant de la fèsta serà lo concèrt de Nadau, que celèbra sos 50 ans sus l’empont. Aquel concèrt se tendrà lo ser del 13 d’agost dins lo pargue del casino.

Lo 14 d’agost, lo pargue del casino aculhirà egalament un mercat de productors locals, ont los vesitaires poiràn degustar e crompar de produches del país. De jòcs tradicionals, d’animacions, de conferéncias e d’exposicions se debanaràn tota la jornada al complèxe del casino.

La serada del 14 d’agost serà animada pel grop Lou Tarabast e se farà un bal tradicional amb Estornapic sus la Plaça del Mercat.

Lo darrièr jorn de la fèsta, lo 15 d’agost, prepausarà de cantèras dins lo centre-vila e se clavarà amb un bal gascon dels Musicians de Comenge sus la Plaça del Mercat a 20h30.

La Hèsta Gascona es un eveniment plan esperat pels abitants de la region e pels vesitaires, que venon nombroses per descobrir e partejar la cultura e las tradicions culinàrias del parçan.

Mai d’informacions sus lahesta.com