Actualitats
A defuntat Hélène Carrère d’Encausse, l’istoriana qu’aviá previst la desparicion de l’URSS
Prigondament jacobina, l’avergonhava son patronim georgian e ela trantalhèt pas brica per atacar las lengas autoctònas de l’estat francés, dont l’occitan
Tèxte legit
Hélène Carrère d’Encausse, l’istoriana especialista de la Russia tsarista e sovietica defuntèt dissabte passat, 5 d’agost, a 94 ans. Nascuda a París Hélène Zourabichvili al sen d’una familha georgiana del caire de son paire, l’intellectual Giorgi Zourabishvili mòrt a Bordèu en 1944, foguèt una de las grandas especialistas europèas de l’istòria russa. D’ideologia conservatritz e fòrtament jacobina, foguèt elegida eurodeputada dins la lista d’union dels partits de drecha en 1994, e demorèt a aquela carga fins en 1999.
En 1978, prediguèt la fin de l’URSS dins son libre L’Empire éclaté. Sa prediccion èra un pauc inexacta pr’amor qu’ela argumentava que l’acabada de l’empèri vendriá de la pression de la fòrta natalitat de las republicas musulmanas de l’Asia Centrala. A mai, la fin de l’URSS l’aviá ja predicha lo politològ Emmanuel Todd, en 1976.
Lo 13 de decembre de 1990, foguèt elegida membre de l’Academia Francesa, e ocupèt lo cadieral numèro 14 qu’eiretèt de Jean Mistler. Pauc apuèi, en 1999, venguèt la primièra femna secretària perpetuala de l’Academia, en remplaçant Maurice Druon. Pasmens, tostemps se designèt de contunh en francés al masculin, coma le secrétaire perpétuel.
L’avergonhava son patronim georgian, Zourabichvili (Zurabishvili), e ela se batèt longtemps per lo remplaçar, çò que li permetèt son matrimòni amb un asseguraire, Louis Carrère d’Encausse. Considerava lo nom d’ostal de son paire coma “embarrassant” e “barbar” en assegurant que la lenga francesa li portava l’identitat qu’ela i aspirava. Es aital que trantalhèt pas brica per atacar las lengas autoctònas de l’estat francés, dont l’occitan, coma se menacèsson lo francés: en 2008, afirmèt la supremacia del francés sus las autras lengas e jos sa direccion aquel an l’Acadèmia Francesa s’opausèt a l’inscripcion de las lengas impròpriament dichas regionalas dins la Constitucion. Tanben menèt d’autres combats lingüistics conservators: en 2017, condemnèt l’escritura inclusiva, en 2019 critiquèt lo feminisme e en 2022 interpelèt lo primièr ministre Jean Castex sus la cartat d’identitat biingua.
Es maire de l’escrivan Emmanuel Carrère, de l’avocata Nathalie Carrère e de la metgessa e jornalista Marina Carrère d’Encausse.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Que l'aví encontrada a Pau arron ua conferéncia a que li aví "auherit" un dessenh umoristic deu dessinator de Sudouest ,Iturria, qui's trufava deus academicians francés qui mespresavan las lengas minorizadas...
Cal ajustar que la dòna Carrèra d'En Causse èra una potinista afogada e que jamai aguèt pas un mot contra l'invasion d'Ucraïna per l'imperialisme rus ni, en mai, contra la politica autocratica menada en Russia -e despuèi longtemps- pel poder potinian. Pas res d'estonant, doncas, al fait que lo tsar actual venga de far omenatge a la pèca utila qu'aviá l'amor del censor e del paire flingaire...
S'entendèm plan aqueste article, la "Carrèra d'en Causse", çò de melhor qu'aja fait per la defensa de nòstra lenga e de nòstra dignitat de pòble, serà estat de se morir. Zourabichvili fasiá barbar ? En morir, a fait tanben fòrça ben a son pòble d'origina. Per semblar plan mièlhs "civilizada", aquesta mariòla, se seriá degut causir un nom plan coma caliá : Hélène Rue-qui-passe-par-un-plateau-calcaire-tel qu'il-n'y-en-a-guère-en-vraie-France-qui-est-la-France-du-Nord. Considerada la longor del rendut global del daquòs, compreni plan que se siá contentada d'un nom de barbar occitan, totun… Aquò non es pas de "jacobinisme" (volontat de repartir d'un biais rigorosament egalitari las riquesas de la republica sus l'integralitat del territòri, sense n'avantatjar un al despens dels autres). Es de supremacisme, de racisme, de denèc, de mesprètz e, mai que tot, d'ignorància e de necitge.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari