La Comunautat Economica dels Estats de l’Africa Occidentala (CEDEAO) a convocat per deman dijòus una reünion extraordinària a Abuja, Nigèria, per abordar “la situacion politica” en Nigèr après l’expiracion de l’ultimatum que se faguèt al govèrn putschista del general Tchiani. Fa una setmana, la CEDEAO menacèt de far servir la violéncia en tot exigir la restitucion del president Mohamed Bazoum. Totun, l’organizacion a pas precisat s'una intervencion armada serà sus la taula de la reünion de deman. Mentretant, los militars an barrat l’espaci aerian de Nigèr en prevencion d'atacs eventuals del temps que Mali e Burkina Faso son alinhats amb Tchiani e son dispausats a far la guèrra se Nigèr es agarrit.

Tant los Estats Units coma França an reclamat la liberacion de Bazoum e lo retorn de la democracia en Nigèr. Totun, lo president elegit 2021, Mohamed Bazoum, demòra assignat a domicili.

Lo recent còp d’Estat dirigit pel general Tchiani a bassacat Nigèr e lo Mond entièr, en desvelant la frustracion e lo malcontentament prigonds dels nigerins fàcia a l’espoliacion que la patís de l’Occident, mai que mai de França. Los militars rebèls asseguran que combaton lo neocolonialisme de França e dels Estats Units, qu’a menat lo país a una pauretat extrèma del temps que n’esplechan las ressorsas naturalas. De fach, una de las primièras mesuras del govèrn putschista per arrestar aquela espoliacion es d’enebir l’exportacion d’aur e d’urani devèrs França. La relacion entre aqueste país e Nigèr es significativa, pr’amor qu’una ampola sus tres en França es alucada amd d’urani de Nigèr del temps que l’80% dels nigerins an pas l’accès a l’electricitat.

Ara, Tchiani s’es autoproclamat president de la transicion del país e a promés de crear las condicions per far una transicion e convocar d'eleccions dins un temps rasonable. Compta sus un gran supòrt popular, e tanben lo sosten Russia.