Dimenge de matin foguèron trobats, dins lor bastida de Monza (Corbièras), los còrses salvatjament assassinats d’un parelh. Venián d’organizar un barbacoa dissabte de ser en cò lor, que i avián recebut fòrça convidats. La polícia a reculhit de traças d’ADN mas i a pas cap de detengut. Lo nenon, dins sos 18 meses, foguèt trobat viu e indemne dins son brèç qu’èra plen de sang.

De desenats de còps de cotèl, de destral e de machete, un det talhat e mai una ferida de flècha; es l’orror que trobèron dimenge passat dins una bastida a Monza (Corbièras). S’agís de Loïc Cariou, dins sos 50 ans e d’origina bretona, e de sa femna Géraldine, dins sos 40 ans. Lo parelh foguèt trobat dimenge de matin a 11h dins sa cambra, ont las parets e lo tech èran plens de sang, segon d’informacions de Midi Libre.
 
Lo mètge legista de Montpelhièr qu’a facha l’autopsia confirmèt ièr lo masèl. Loïc recebèt 50 còps de cotèl e una ferida de flècha a l’aissèla. Géraldine, en mai d’aquò, foguèt trobada mòrta amb un det talhat.
 
Lo petit Jean, dins sos 18 meses, dormissiá dins lo brèç de sa cambra personala e foguèt trobat indemne, e mai se i aviá tot plen de sang sus lo brèç.
 
Lo parelh aviá organizat dissabte de ser un barbacoa amb fòrça convidats, segon d’informacions d’Scoop34.
 
Loïc e Géraldine demoravan a Monza dempuèi un desenat d’ans. El èra comercial e aviá una veitura de foncion. Ela aviá trabalhat coma serviciala a la ciutat medievala de Carcassona abans de quitar l’emplec per se consagrar al petit enfanton. Avián “una vida simpla e seriosa” segon las declaracions d’un pròche a L’Indépendant.
 
Loïc e Géraldine Cariou avián agut quatre enfants, d’entre 12 e 20 ans, de lors primièrs maridatges, abans la naissença en 2011 del petit Jean. “Al calgut retrobar rapidament totes los membres de la familha. A priòri, totes son vius” segon una font pròcha del dorsièr citada per Midi Libre.