En despièch de lor popularitat creissenta, las piscinas privadas en Occitània afrontan d’enjòcs màgers a causas de las secadas recurrentas e de las restriccions consecutivas impausadas per las autoritats. Après los Estats Units, França es lo país amb lo màger nombre de piscinas privadas de la planeta, 3,4 milions, e l’immensa majoritat d’elas son dins lo sud d’Occitània, mai que mai en Lengadòc, Provença e Comtat de Niça. Ara, lo chepic creissent pertocant lo consum d’aiga e las enebicions prefectoralas pausan de questions sus l’avenidor de las piscinas privadas, çò rapòrta Libération.

L'afogament per las piscinas privadas a conegut una creissença exponenciala dempuèi los ans 2000, se tresmudant en un element comun  als jardins occitans, quand quitèron d’èsser percebudas coma un signe d'estatut social naut e venguèron plan mai accessiblas. Pasmens, las secadas e las enebicions d'asagatge fan questionar lor durabilitat.

Los proprietaris de piscinas afrontan de reglamentacions estrictas en cas de secada. Los prefèctes son responsables de l'emission d'arrestats per restrénher l'utilizacion de l'aiga, e las multas pòdon aténher los 1500 èuros en cas de non-respècte d'aquelas règlas. Mentre que los proprietaris cèrcan de mejans de minimizar l'impacte de lors piscinas sul consum d'aiga, s’es adoptat de solucions mai ecoresponsablas coma lo tractament amb de sal en plaça del clòr e la reütilizacion de l'aiga.

Ça que la, las piscinas privadas contunhan de suscitar de debats. En qualques endreches, coma per exemple lo departament provençal de Var, an arrestat la bastison de nòvas piscinas per preservar la ressorsa en aiga. Aquela decision miralha la tension entre lo plaser recreatiu de la piscina e la necessitat de preservar las ressorsas naturalas, illustrant aital lo dilèma causat pels lésers aqüatics dins un contèxt de secada.