Vilamòs (Irissa) s'aumplirà dissabte d'arrebrembe e gratitud deth temps qu’amics, familha e activistes pera lengua e era cultura d’Aran s'amassaràn entà rénder aumenatge a Jusèp Antòni Castet Varela, coneishut coma Tònho Castet. Musician, traductor, activista culturau e defensor dera lengua occitana, deishèc un legat inesfaçable dempús deth sòn traspàs eth 16 de junh passat a 67 ans.

Er acte commemoratiu començarà entàs 17h30 damb una missa ena glèisa de Santa Maria de Vilamòs, seguida per ua tièra de vidèos que mostraràn de manèra concisa es moments mès significatius dera sua vida: de moments dera sua mainadesa enquias sòns darrèri esfòrci coma activista e musician que s’entremesclaràn damb cinc pèces musicaus interpretades peth grop qu'eth madeish reviscolèc: Es Paums. Cançons coma Netdehuec, NonploresTonet, AqueresMontanhes, AdiusaraVald'Aran e Tornaram aumpliràn er aire damb melodies que rebatràn era passion que Castet auie pera musica e pera tèrra.

Totun, non solament s'arrebrembarà era sua contribucion musicau, mès tanben era sua dedicacion ara lengua e ara cultura occitanes. Castet ère un academician der Institut d'Estudis Aranesi-Acadèmia Aranesa dera Lengua Occitana (IEA-AALO), e siguec eth president e fondador dera Associacion Es Paums. A trauès d'aquera associacion, promoiguec er art, era musica e era lengua d’Aran, en tot hèr un impacte positiu ena dinamizacion dera cultura locau.

Era sua influéncia s'estenec a publicacions coma Jornalet e Sapiéncia, e aufric era sua sabença coma ensenhaire ar Institut Aranés. Ath delà, realizèc traduccions arremercades, en tot includir-i albums de Tintin e Alícia en País des Meravilhes de Lewis Carroll, publicat peth Conselh Generau d'Aran en 2019.

Tònho Castet ère diplomat en psicologia e auec un mestratge en direccion de vendes, çò que l’amièc a trabalhar en ua societat d’assegurances. Totun, en 2015 cambièc era sua dedicacion quan li siguec diagnosticada ua malautia neurodegenerativa. A compdar d'alavetz, consacrèc era sua energia e passion ara promocion dera lengua e era cultura d’Aran, en tot reviscolar era formacion musicau des Paums e en tot contribuïr ar activisme lingüistic e culturau.

Er aumenatge culminarà damb ua alugada de candeles e era lectura d'escrits personaus en aunor de Tònho Castet, en tot arrebrembar era sua luta constanta peth legat culturau e lingüistic dera Val d’Aran.