L’escrivana sarda Michela Murgia es mòrta a 51 ans dins la nuèch de dijòus a divendres a causa d’un càncer del ren. Activista independentista, d’esquèrra, feminista e defensora dels dreches LGBTI, aviá explicada sa situacion dins una entrevista al Corriere della Sera e disiá qu'esperava de resistir e de poder morir quand l’ultradrechista Giorgia Meloni auriá quitat d'èsser la primièra ministra d’Itàlia.

Parlava de son òbra coma una “literatura d’intervencion” per son engatjament social e cultural, que l’exercissiá ela per mejan de las paginas de sos libres e suls rets socials. Aital provocava de reflexions criticas sus l’emancipacion de las femnas, l'immigracion, los dreches de las personas LGBTI e lo drech de Sardenha d’aténher l’independéncia.

A mai d'èsser escrivana, dramaturga e cronicaira, aviá tanben facha la professora de religion e la directritz  d’una centrala termoelectrica; es per aquela rason que disiá qu’aviá viscutmai d’una vida. Son engatjament la menèt a se presentar a la presidéncia de Sardenha amb la coalicion independentista Sardegna Possibile per las eleccions del 16 de febrièr de 2014. Capitèt pas.

Murgia intrèt dins lo mond de las letras amb lo libre Il mondo deve sapere, publicat originàriament dins un blòg ont parlava de l’esplecha laborala, e amb Viaggio in Sardegna. Totun, lo grand succès arribèt amb Accabadora, un roman que conta las tradicions sardas dins los ans 1950 dins una pichona vila de Sardenha per mejan de la vida d’una cordurièra qu’adòpta una filha.