La capitala de Bearn prepausa a partir de deman tres jorns de fèsta a l’entorn de la cultura occitana. La 19a edicion del festenal Hestiv’òc ten ongan una vintena d’artistas presents sus l’empont e per carrièras.

Lo festenal comença totjorn amb una impressionanta cantèra de dobertura interpretada per de milièrs de festenalièrs, puèi prepausa durant tres jornadas, sus la granda scèna o al teatre de Sant Loís, de fèstas pels enfants, de concèrts, d’estanquets de restauracion, d’espectacles en vila...

Hestivòc espeliguèt en 2005 a partir de l’iniciativa volontària d’Accents del Sud. Aquela organizacion culturala a un vintenat de personas benevòlas qu’arriban d’èsser 80 pendent los jorns del festenal. La division dels prètzfaches en còlas de trabalh es la clau del succès de l’associacion. Cal cercar l’origina del Hestiv’Òc pendent l’an 2003, quand dos sòcis fondadors constatèron lo succès del Festenal Interceltic de la vila bretona d’An Oriant. Dich e fach. Un an puèi, creèron, amb mai de mond motivats, l’associacion Accents del Sud amb la tòca d’impulsar un festenal cultural, que vegèt lo jorn en 2005.

Lo festenal se caracteriza tanben per una actitud responsabla e solidària. I a una atencion especiala per las personas amb de problèmas de mobilitat; en mai d’aquò, l’organizacion ensaja de veire qu’una granda part del material emplegat siá reciclabla e que los participants partegen las veituras per congestionar pas la vila. Coma totjorn, totes los espectacles son gratuits e destinats al public familial.

Podètz trobar tota l’informacion e lo programa del festenal aicí, sul sit web del Hestiv’Òc, e mai, malaürosament, siá solament en version francesa.