La primièra iniciativa ciutadana d’encastre europèu (ICE) amassèt mai d’un milion e mièg de signaturas per demandar que se reconesca l’aiga e l’assaniment coma un drech uman, en seguissent la declaracion de l’ÒNU de 2010. Los promotors d’aquela ICE, la Federacion Sindicala Europèa dels Servicis Publics, amb d’autres collectius pretendon arribar als dos milions de signaturas abans lo 9 de setembre, e mai s’amb un milion n’i auriá pro per presentar la proposicion a l’UE.
 
De fach, la campanha es començada en tot capitar. Lo comissari europèu del Mercat Interior e dels Servicis, Michel Barnier, reconeissiá fa qualques jorns que la gestion de l’aiga farà pas partida de la directiva de l’Union Europèa que cèrca de regular los contractes entre las administracions e las societats privadas per la concession de servicis publics coma l’energia, los transpòrts e la pòsta.
 
“Compreni plan perqué los ciutadans son tant embestiats e agaçants quand se lor ditz que lors servicis d’aiga poirián èsser privatizats contra lor volontat. Ieu me sentiriái parièr s’aquel risc existiguèsse”, çò disiá Barnier. Ça que la lo comissari defend que la directiva èra pas un assag de l’UE per privatizar l’aiga “per la pòrta de darrièr”, mas un mecanisme per “melhorar la seguretat legala” dels contractes, per “assegurar la transparéncia” e l’“egalitat de tractament” dins lo mercat intèrne. Per contra, los grops per la defensa de l’aiga publica en Euròpa vesián qu’aquela mesura èra una via sens retorn per que la ressorsa de l’aiga venguèsse un afar lucratiu.
 
A l’ora d’ara, l’UE a beneficiat a las intencions privatizairas de sos estats membres e a promogut l’externalizacion del servici de l’aiga coma una de las imposicions de la Tròica per redusir lo deficit public e la concession de crèdits de salvament financièr dins qualques païses.
 
Los procèsses de remunicipalizacion, de fòrça municipalitats de l’estat francés, an tanplan ajudat a la decision de Barnier. Al delà, lo cònsol de Berlin, Klaus Wowereit, anoncièt a la fin de junh qu’èra en negociacions per que lo servici de l’aiga dins la capitala alemanda tornèsse èsser public. París a anonciat tanplan que tornarà a la gestion publica de l’aiga. En Espanha, mai de la mitat de la populacion se provesís amb d’entrepresas privadas.