Las resultas de las partidas de divendres de ser botavan la pression suls catalans. Saint Helens, en batent aisidament Hull KR 28-12, e Wigan, mercé a un tombat en fin de prolongacion fàcia a Hull-FC (13-12), tornavan a 2 punts dels Sang e Aur al classament.

Dissabte, los Dragons jogavan cò del tresen representant dels percaçaires , los venceires de la Cup: Leigh. Los Leopards menavan a la pausa 14-12, mas dins lo segond temps, los catalans marcavan tres ensages transformats sens encaissar un punt. Victòria catalana: 30-14 . Demòran atal en cap de classament amb quatre punts d’avança sus Wigan e Saint Helens e sièis sus Leigh.

Dissabte, recebràn a Brutus (ont los dirigents an fait ajustar dos gradins suplementaris) Wigan per refortir aquel avantatge.

Aquò marca plan mal per Wakefield que, sus sa pelena, a perdut “la partida de la mòrt” fàcia a Castleford: 12-28, e que vei las pòrtas del Championship se dobrir en grand per eles.

Tolosa en fin de partida

Lo Tolosa Olimpic voldriá plan faire lo camin contrari e amira una segonda plaça en Championship que li permetriá de jogar a domicili la mièja finala. Aqueste dissabte, los occitans recebián los Lions de Swinton sus la pelena de Domèc a Carcassona jos una calorassa e un solelh a cambiar los angleses en lingombaus! Las doas esquipas prepausèron un jòc monocòrde e gaire inspirat. Calguèt esperar las darrièras dètz minutas per veire los Blau e Blanc faire la diferéncia e ganhar 26-6. Dissabte, es sus la pelena de l’estadi Mazicon d’Albi (a 17h) que los tolosans recebràn Barrow.

XIII-cadieral: la Cup pels Andidragons

L’equipa catalana de XIII-cadieral a pas fait las causas a mièjas a Sheffield, aqueste dimenge 20 d’agost, en finala de la Cup fàcia a Leeds: Nicolas Clausells marca 5 ensages, sos collègas 7 de mai e los Sang e Aur tornan lo trofèu a Perpinhan amb una victòria sus la marca de 66 (?!!!) a 20.

Darrièr rendètz-vos de la sason: aqueste divendres 25, a Cabestany (19h30): un rescontre amb Halifax, campion d’Anglatèrra, per emportar lo trofèu europèu.

NRL: Melbourne novèl qualificat

A doas jornadas de la fin de la fasa de classament, Melbourne jonh Penrith, Brisbane e los neozelandeses dins los qualificats per las fasas finalas. Deurián èsser acompanhats per Cronulla, Newcastle e Canberra. La ueitena plaça demòra en jòc entre los Lapinons, los Vaquièrs e de Polets qu’an levat los darrièrs sòmis de qualificacion a las Anguialas (victòria: 34-12)

Dos torneges dins lo Pacific

En octòbre e a la debuta de novembre, un còp la sason NRL acabada, dos torneges, un masculin e un femenin, metràn en competicion las formacions nacionalas del Pacific: Austràlia, Fiji, illas Cook, Nòva Zelanda, Papoa-Nòva Guinèa, Samoa e Tonga.

De notar una partida internacionala originala que se jogarà lo divendres 15 de setembre al Molin de Lesinhan: lo rescontre entre la seleccion de la polícia de Queensland e una seleccion de policièrs municipals d’Occitània. Un partida que serà probable malaisida d’arbitrar se cada jogaire fa seguir son fiulet!