Nimes visquèt diluns de ser un drama ponhent après la mòrt d’un dròlle de 10 ans d’una fusilhada qu’aguèt luòc dins lo quartièr de Pissavin. A l’entorn de 23h30, una veitura menada per un òme de 28 ans e sos dos nebots de 7 e 10 ans foguèt presa dins las balas en plen còr del quartièr. Lo menaire foguèt nafrat de tres balas dins l’esquina, mas sa vida es pas en perilh. Es pas lo cas del petit de 10 ans que poguèt pas subreviure a sas nafras e defuntèt pauc après son arribada a l’espital.

Segon las declaracions de l’oncle als policièrs, el cresiá que lo dròlle seriá sortit de l’àuto pendent la fusilhada mas, en realitat, demorèt blocat dins sa cencha de securitat fòra del veïcul. Lo tresen ocupant de l’àuto, lo mainatge de 7 ans, aürosament escapèt al fuòc, çò rapòrta Libération.

Los autors d’aquela fusilhada son totjorn en fugida, e de fonts policièras indican qu’i poiriá aver fins a quatre tiraires implicats. Segon la procuraira de Nimes, Cécile Gençac, aquela tragèdia es restacada al trafec de las drògas. Lo quartièr de Pissavin es soven protagonista dels conflictes ligats al narcotrafec dempuèi un certan temps.

Lo dròlle de 10 ans e son oncle son de victimas collateralas innocentas, qu’an pas cap de ligam amb d’activitats criminalas, segon la procuraira. La situacion dins aquel quartièr e la proliferacion de la violéncia restacada al trafec de dròga an suscitat l’indignacion de la populacion locala e dels responsables politics. Lo ministre de l’Interior, Gérald Darmanin, a exprimit son chòc davant aquela tragèdia e a promés que los responsables demorarián pas impunits.

🚨 Un enfant de 10 ans a été tué cette nuit lors d’une fusillade à #Nîmes.

Il se trouvait dans la voiture de son oncle, lui aussi blessé par balle, en bas d'un immeuble du quartier Pissevin, où se trouve également un point de deal. pic.twitter.com/PuMXQrJBc0

— GOSSIP ROOM (@GossipRoomOff) August 22, 2023