Se parla sovent de las implicacions, perilhs e menaças que pòt representar l’usatge que fan qualques grandas entrepresas d’Internet amb las donadas dels usatgièrs. La delegacion neozelandesa de l’ONG Amnestia Internacionala es anada un pauc mai luènh e a volgut mostrar, amb Trial by Timeline, çò que poiriá arribar a quin membre que siá del ret social Facebook se las siás donadas foguèsson analisadas per cèrts govèrns e regims dictatorials.
 
Sus Trial by Timeline, quin individú que siá amb un compte en lo principal ret social mondial a l’escasença de verificar, sus sa pèl pròpria, per quals contenguts del sieu perfil poiriá èsser perseguit e per quals païses del Mond.
 
L’usatgièr deu permetre l’accès segur a las donadas del sieu perfil personal, per que lo logicial las examine minuciosament: la lista dels contactes, los ligams dirèctes amb d’associacions de dreches umans, los eveniments que i a participat, las fotografias que i a penjadas... En paucas minutas, l’aplicacion ditz la senténcia: lo verdicte indica se la nòstra activitat abituala sus Facebook nos expausariá a una condemnacion o a de persecucions judiciàrias dins d’autres païses.