A començat en Japon l’escampament de l’aiga tractada de Fukushima dins l’ocean Pacific, en despièch dels chepics dels pescadors, dels partits de l’oposicion e dels païses de l’entorn. Al total seràn liberats mai d’un milion de tonas metricas d’aiga contaminada, çò es l’equivalent de cinc cents piscinas olimpicas.

Las autoritats japonesas e l’Agéncia Internacionala de l’Energia Atomica considèran segur lo procès, mas i a totplen de chepics  pertocant l’impacte sus la vida marina e la cadena alimentària. Los scientifics debaton de las consequéncias de tèrme long e de las repercussions globalas d’aquela decision.

Tant l’indústria pescadora coma divèrses païses, dont la Corèa del Sud e China, s’opausan a l’escampament, malgrat que lo govèrn japonés assegure que contrarotlarà l’aiga e ofrirà de compensacions. China a enebit la crompa de produches de pesca japoneses.

Es segur de daissar rajar l’aiga de la centrala nucleara de Fukushima? Que ne sabèm? A prepaus d’aquelas questions, The Washington Post  publica un rapòrt que tanben podètz legir en catalan gràcias a Vilaweb.