Los ministres dels Afars Estrangièrs de l’Union Europèa (UE) s’acordèron ièr per rengar la branca militara del grop libanés de l’Hizbullah dins la lista de las organizacions terroristas. Segon de fonts comunautàrias, l’acòrdi se prenguèt a l’unanimitat mas deguèt despassar las reticéncias de qualques païses, qu’an paur de l’impacte qu’aquela decision pòt aver en la fragila estabilitat de Liban, ont l’Hizbullah es plan popular. Mas fin finala la propòsta del Reialme Unit s’impausèt.
 
La decision s’es presa en responsa a un atemptat suicidari, comés presumidament per l’Hizbullah, que causèt uèch mòrts fa un an en Bulgaria; e mai prevei de manténer la cooperacion amb lo govèrn libanés, lo dialòg amb totas las fòrças politicas e lo porgiment d’ajuda financièra e umanitària. Aital l’UE cèrca d’“empedir que de terroristas tròben refugi dins lo territòri comunautari sens qu’aquò afècte l’estabilitat de la region”.
 
L’inclusion de l’Hizbullah dins la lista dels grops terroristas supausa un aument de las mesuras de contraròtle e un blocatge de l’economia del partit libanés.
 
L’Hizbullah es un grop islamic libanés que seguís l’ideologia shiita preconizada per l’aiatollà Khomeini, lo cap de la revolucion islamica iraniana. A una branca civila e una branca militara. Foguèt fondat en 1982 per combatre l’ocupacion israeliana del sud de Liban. Dins lo mond arabi e musulman es considerat majoritàriament coma un movement legitim de resisténcia.