L’Organizacion de Recèrca Espaciala d’Índia (ISRO en anglés) a atench una brava capitada amb l’aluniment reüssit de la nau Chandrayaan-3 sus la superfícia del pòl sud del satellit natural de la Tèrra. L’eveniment se retransmetèt en linha, l’ecran mostrava tanben los engenhaires de l’ISRO dins la sala de contraròtle e lo primièr ministre, Narendra Modi, a observar.

Aquel aluniment representa una granda avançada per Índia sul terren de l’exploracion espaciala, que ven una poténcia scientifica modèrna. Modi descriguèt lo succès coma l’anóncia d’una “Índia modèrna e avançada”.

Índia es venguda lo cinquen país que reüssís a pausar un engenh sus la Luna, e demòstra aital sas competéncias en engenhariá espaciala e son ambicion d’èsser un actor important de l’indústria espaciala mondiala. En mai d’aquò, aquela mission portarà de donadas importantas per la futura exploracion lunara e la creacion de basas abitadas; lo pòl sud de la Luna es mai que mai important per la probabla preséncia d’aiga dins son airal.

Índia aviá ensajada aquela mission fa quatre ans mas capitèt mal. Ara, son succès s’es vist amplificat car es arribat qualques jorns après la malescasuda temptativa de Russia de pausar una nau sus aquela meteissa region lunara.