Una polida fèsta s’anonciava a Brutus aqueste dissabte de ser per la partida entre los Dragons e Wigan: un milierat d’angleses èran venguts; las tribunas avián de mal per reçaupre los 11 000 espectators… Manquèt una sola causa per que la fèsta foguèsse bèla: los Dragons se mostrèron coma absents, multipliquèron las decas fàcia a una esquipa mai incisiva e mai determinada. Wigan marquèt quatre ensages dins lo primièr temps (22-0), n’ajustèt dos puèi per una victòria 34-0, saludada per un arcolan dins lo cèl catalan.

En plaça de faire lo trauc en cap de classament, los catalans veson Wigan e Saint Helens (que ganha a Castleford: 34-4) tornar a dos punts.

Hull KR, que los catalans aniràn rescontrar divendres, pren lo revenge de la Cup fàcia a Leigh: 52-10. Salford contunha d’enfonzar Wakefield: 20-0. Warrington torna trapar los camins de la victòria en ganhant cò d’HullF C: 18-4.

Championship: Tolosa en forma

A Albi, Tolosa Olimpic s’es impausat aisidament fàcia a Barrow: 34-10 e refortís sa segonda plaça al classament abans d’anar jogar a Newcastle aqueste dissabte de vèspre, puèi a Halifax abans de reçaupre lo primadièr Featherstone.

Mièg trofèu pels Andidragons

Divendres de ser, dins lo gimnasi de Cabestany, se jogava la partida de XIII-cadieral entre las Pantèras d’Halifax, campions d’Anglatèrra, e los Andidragons, campions de França. La partida foguèt tan sarrada que s’acabèt sus una marca d’egalitat: 32-32.

NRL: qual serà lo ueiten qualificat?

Las causas se precisan en aquesta fin de la fasa de classament en Austràlia. Bròncos e Pantèras reçaupràn al primièr torn qualificatiu los neozelandeses e Melbourne. Las darrièras partidas determinaràn los rescontres.

Se Newcastle et Cronulla son plaçats per reçaupre dins los quarts eliminatòris, las 7a e 8a plaça son en jòc entre Canberra, los Vaquièrs e las doas formacions de Sydney: Lapinons e Polets que se rescontraràn divendres.

Aude, departament del Pacific

Los tres clubs audencs d’Elèit 1 se refortisson amb de jogaires de l’emisfèri sud. A Carcassona, los dos fijians Drodrolagi e Serulevu portaràn lo malhòt canari per la tresena annada. Arriba lo jove neozelandés AJ Leaga Mini (??!)que pòt jogar centre, segonda o tresena-linha. A Limós, es anonciat lo pilar Darry Schonig qu’a jogat de partidas d’NRL jol malhòt de Melbourne. Connor O’Beirne daissa Carcassona per Lesinhan ont arriban l’internacional fijian Ranu Inoke Vasuturaga (centre o segonda-linha), lo pilar australian Stuart Mason e lo pilar neozelandés Takitau Mapapalangi. Se pòt demandar se demòra encara d’òmes fòrts en Corbièras?