Divèrsas entrepresas de l'Euròpa de l'Èst  recrutan de personal asiatic per compensar la manca de man d'òbra dins de sectors clau coma la construccion e las manufacturas. Aquel cambiament inesperat de las politicas d'immigracion contrasta amb los discorses contra l’immigracion prononciats pels govèrns de païses coma Polonha e Ongria, çò rapòrta Bloomberg. La societat petroquimica polonesa Orlen, per exemple, a fach venir de milièrs de trabalhadors asiatics per bastir un sit nòu, del temps qu’Ongria cèrca mièg milion de trabalhadors dins los dos ans avenidors per desvolopar son economia.

Aqueles païses, qu’avián refusadas las quòtas d'immigrants de l'UE, justifican ara la crida a aqueles trabalhadors coma "convidats" temporaris per de projèctes especifics. Aquela virada a provocadas de criticas dels opausants politics e a generats de debats sus lors discorses a prepaus de l'immigracion. La manca de man d'òbra s'es intensificada dins aquelas economias après l’invasion russa d’Ucraïna, qu’a alterat lo flux de trabalhadors dins la region.

En contradiccion amb los discorses passats contra l'immigracion, aqueles païses comptan sus de salariats estrangièrs per impulsar lors projèctes d'investiments e assegurar la creissença economica. Aquel cambiament pòt tanben provocar de tensions amb la populacion locala.

Las entrepresas començaràn de convidar mai de trabalhadors asiatics per menar a bon tèrme lors megaprojèctes. Los besonhs economics e las politicas migratòrias se tròban doncas ara a un caireforc, mentre qu’aqueles païses cèrcan de manténer lor economia amb l'ajuda de la man d'òbra estrangièra.