Fins a dimenge 28 de julhet, la vila de Rodés aculhís l’Estivada, un dels eveniments màgers de la cultura occitana. Ongan se i debanarà tanben lo festenal de cinèma occitan “La Llanterna Digital”. Lo festenal comença amb un còp dur del Conselh General d’Avairon, qu’a anonciat una reduccion de 75% de la subvencion justament lo jorn de l’inauguracion, çò qu’a provocat una granda indignacion del public. Segon Roux, s’agiriá d’un reglament de comptes politic entre lo departament e la municipalitat.

Tre diluns passat, se debana a Rodés l’Estivada qu’ongan festeja sos 20 ans.
 
Dins la Val de Borran trobam lo grand empont, los estanquets, los taulièrs de las entrepresas e dels collectius del país e un fum de mond. Qualques eveniments se debanan dins d’autres endreches de la capitala de Roergue.
 
Son de remarcar los concèrts dels catalans Pep Gimeno el Botifarra e Obrint Pas; e dels occitans Guilhèm Lopez, Gitanistan Orchestra, Mauresca, Lo Còr de la Plana, e plan d’autres. Lo concèrt de Roger Mas, previst per dimars de ser, s’anullèt a causa dels auratges, mas la Cobla Sant Jordi, que l’acompanha, faguèt un concèrt polit e corós dins un capitèl, que s’acabèt amb un espontanèu e esglasiant Se Canta.
 
Ongan cal soslinhar la nòva formacion Òc Connection qu’amassa Lo Dalfin (escrivon Lou Dalfin) amb Papet, Joan de Nadau, Lo Còr de la Plana, Andrèu Ricròs, Los Bohaires… Una confrontacion menada a l’extrèm entre las musicas actualas e los instruments tradicionals.
 
 
Acòrdi amb la Fièra Mediterranèa de Manresa
 
L’Estivada convida dempuèi d’annadas ja d’artistas catalans mas ongan ven d’establir un acòrdi amb la Fièra Mediterranèa de Manresa (Païses Catalans) per doas edicions. L’acòrdi a per tòca de far conéisser los artistas catalans en Occitània, e los occitans als Païses Catalans, e de se far promocion mutualament. Al delà dels concèrts, los balètis, las conferéncias, lo teatre, las animacions, las performanças, las seradas de poesia, de literatura e de cabaret de cada ser, lo festenal interregional de las culturas occitanas aculhís ongan lo cicle de cinèma occitan “La Llanterna Digital”.
 
 
Còp dur del departament
 
Diluns de ser, pendent la velha de l’inauguracion del festenal, lo conselh general d’Avairon anoncièt sa decision de baissar drasticament la subvencion acordada. Ongan, doncas, balharà 15 000 èuros de mens, çò qu’es una reduccion subta de 73%.
 
S’agís d’un còp dur se prenèm en compte qu’ongan s’èra demandat una aumentacion d’aquela subvencion per poder festejar lo 20n anniversari amb dignitat.

Segon l’administracion s’agís de reduccions budgetàrias pr’amor de la crisi economica.
 
Segon Patric Roux, director de l’Estivada, es un vertadièr “còp de ponhal”. “Es pas intelligent d’anonciar aquò la velha de la dobertura del festenal, es una provocacion”, çò disiá Roux, qu’apondiá qu’“en Corsega aquò se passariá pas”.
 
La còla de Jornalet avèm entendut sus plaça que darrièr aquel còp dur i pòt aver de reglaments de comptes politics entre lo departament e la municipalitat de Rodés.
 
 
Seguiment mediatic
 
En mai de la television de l’estivada EsTV —menada per la còla de Dètz qu’es de mai en mai professionala—, lo festenal es seguit pels mèdias de la Federacion Interregionala dels Mèdias Occitans (FIMÒC).  Se volètz èsser informats a la minuta, La Setmana vos fa partejar l’Estivada en dirècte. Trobaretz cada jorn un article detalhat e d’entrevistas d’escotar. Al delà, per Twitter s’informa del debanament de la fèsta. Ràdio País e Ràdio Occitània rapòrtan sus l’Estivada, sus plaça, cada jorn, en dirècte, de 18h a 20h. La còla de Jornalet i sèm tanplan.
 
Seguissètz l’Estivada sus Twitter:  #Estivada o #Estivada2013.


Tuits sobre "#estivada"