Marrida passa pels Dragons Catalans. Aprèp la desbranda fàcia a Wigan, divendres de ser, en desplaçament a Hull KR los Sang e Aur  èran victimas de lor indisciplina e perdián 26-18. Per acorchir los desplaçaments, lo club aviá retengut un avion privat que se poguèt pas pausar al retorn a Perpinhan. Foguèt desvirat cap a Montpelhièr ont res èra pas organizat per los menar a l’ostal!

Coma Wigan a batut Salford 26-8 e que Saint Helens es anat ganhar 32-16 a Wakefield, los tres esquipas se trapan amb 34 punts. Wigan es primièr e los catalans sèrvan la segonda plaça amb un cort avantage a la diferéncia de punts sus Saint Helens.

Divendres, los catalans tornaràn prene los aires per jogar a Wakefield, totjorn darrièr e qu’ensaja, amb l’energia del desespèr, de salvar sa pèl.

Championship: lo TO assegurat de la segonda plaça

Dissabte, en anant batre Newcastle 36-16, lo Tolosa Olimpic assegura sa segonda plaça a 3 jornadas de la fin amb 7 punts d’avança sul tresen, Halifax, qu’anirà rescontrar aqueste dissabte 9.

NRL: los Polets se qualifican

La darrièra jornada de la fasa de classament a permés la designacion dels darrièrs dos participants a las pelhòfas.

Fin de la sason pels Vaquièrs batuts per Penrith (12-44) e tanben pels Lapinons que pèrdon la partida decisiva fàcia als Polets (12-26).

En cap de classament, se jogaràn doncas las partidas qualificativas: Brisbane (2d)-Melbourne (3n) (divendres) e Penrith (1r)-Combatents Neozelandeses (4n) (dissabte). Los ganhants en mièja finala e los perdents en barratge.

Per las plaças seguentas, se jogaràn las partidas: Làmias (6n)-Polets (7n) (dissabte) e Newcastle (5n)-Canberra (8n) (dimenge). Los ganhants en barratge e sason acabada pels perdents.

Acamp federal a Perpinhan

La Federacion s’acamparà dissabte a Perpinhan per designar un novèl president e tanben per organizar mai precisament la sason novèla.