Lo reconegut videopodcast País Invisible a aviada son tras qu’esperada segonda sason, en ofrissent a sos seguidors una experiéncia encara mai rica e atractiva. Amb mai de contenguts e de nòvas seccions, aquesta temporada promet de far descobrir mai d’endreches de la Val d’Aran e d’Occitània en general.

La segonda sason comencèt dissabte passat amb un episòdi consagrat a Montgarri, e a ja captivat l’audiéncia amb son estil unic d’explorar l’istòria, las costumas e lo parçan. A mai de las seccions abitualas, que comprenon de vesitas quinzenalas de divèrses endreches d’Occitània e d’entrevistas de convidats de la region, se tròba ara la nòva seccion “Occitània explicada a Votz off” que la presenta l’escrivan Manèl Zabala amb son esperit umoristic caracteristic.

Una de las principalas novetats es lo lançament del nòu sit web paisinvisible.cat, que permet als usatgièrs de seguir las emissions dirèctament sul sit, de crear de perfils d’usatgièr per èsser al fil de las darrièras actualizacions e salvagardar de contenguts per visualizar o escotar mai endavant. Aquela foncionalitat melhora significativament l’experiéncia dels seguidors e facilita l’accès als contenguts del programa.

País Invisible se pòt escotar a travèrs de plataformas coma Spotify e Ivoox, e los episòdis son tanben disponibles per agachar sus YouTube. Totun, ara se pòt trobar dirèctament del web estant.

País Invisible es un videopodcast que cèrca de far conéisser Occitània al public catalan. Produch per l’Associacion per la Difusion d’Occitània en Catalonha, que mena a bon tèrme Jornalet, País Invisible es dirigit e presentat per Zep Armentano que compta sus tota una còla compausada per Ferriòl Macip, David Valls, Eric Laquente e Manèl Zabala. Dempuèi sa primièra sason es vengut pro popular en tot obténer tres prèmis de prestigi: lo prèmi de joventut de l’Euroregion, lo prèmi Sonòr de la melhora produccion e lo prèmi de la Comunicacion Locala 2023 dins la categoria de melhor contengut àudio.