Dotze cases de botulisme, dont un decès, son estats enregistrats après que de clients d’un restaurant de Bordèu consumèron de sardinas en consèrva artisanalas, çò rapòrta Libération.

L’espital Pellegrin de Bordèu a raportats dotze cases, dont uèch son totjorn espitalizats al CHU de Bordèu. A mai, la Direccion generala de la Santat (DGS) a confirmat lo decès d’una femna de 32 ans en Illa de França.

Las autoritats sanitàrias enquistan sus l’origina d’aquela intoxicacion alimentària e avertisson que d’autres cases poirián subrevenir a causa del relambi d’incubacion de la malautiá. Los pacients presentan divèrses simptòmas grèus, sustot una paralisi musculara. Las autoritats recomandan als que mangèron dins aquel restaurant e manifèstan de simptòmas que consulten de tira un mètge.

Lo botulisme es una malautiá rara e potencialament mortala provocada per una toxina producha per la bacteria clostridium botulinum, que se desvolopa mai que mai dins los aliments mal conservats. Aquela toxina ataca lo sistèma nerviós.

Totes los pacients avián frequentat lo meteis establiment a Bordèu entre lo 4 e lo 10 de setembre de 2023 e avián consumadas de sardinas en consèrva artisanalas fornidas pel restaurant. D’analisis son en cors per confirmar biologicament lo botulisme, mas puèi que lo temps d’incubacion de la malautiá vària de qualques oras a qualques jorns, d’autres cases restacats amb lo restaurant son pas excluses, çò a avertit la DGS.

Lo gerent de l’establiment a admés aver servidas de consèrvas de sardinas artisanalas, que qualques unas foguèron getadas a causa d’una “fòrta odor”. Las autoritats sanitàrias trabalhan en collaboracion amb Santat Publica França e lo centre estatal de referéncia del botulisme de l’Institut Pasteur per gerir la situacion.

La comunautat medicala susvelha de près aquela situacion excepcionala de botulisme a Bordèu, amb d’implicacions potencialament grèvas per la santat publica.