Las autoritats d’Artsakh, un territòri tanben conegut coma lo Naut Karabagh, arribèron dimècres a un acòrdi d’alta al fuòc amb Azerbaitjan après l’operacion militara que l’aviá començada aquel país dimars en violant la trèva de 2020, e qu’a daissat una trentena de mòrts. L’acòrdi considèra de concessions importantas dont la desmilitarizacion totala d’Artsakh, lo retirament de las tropas armènias e tanben, çò sembla, l’integracion del país dins l’estat azèri.

De representants dels dos govèrns se reünisson uèi a Yevlakh, en Azerbaitjan, e tractaràn d’efièch l’integracion del Naut Karabagh dins Azerbaitjan, gaireben 32 ans après son independéncia, e lo retirament de totas las tropas armènias.

Lo Naut Karabakh es una region de majoritat armènia que las autoritats sovieticas inseriguèron dins Azerbaitjan. Amb la desparicion de l’URSS, comencèt una guèrra de granda escala amb Armenia, que se concluguèt amb la mòrt d’environ 30 000 personas e la consolidacion d’una republica independenta de facto, la Republica d’Artsakh, reconeguda internacionalament sonque per Armenia.

A partir d'alavetz, las autoritats àzeris an violat regularament la precària alta al fuòc fins qu’en 2020 i aguèsse una guèrra dins la quala Azerbaitjan  aprofechèt sa superioritat demografica e lo sosten de Turquia. En setembre d’arunan, la guèrra se faguèt dirèctament entre Armenia e Azerbaitjan, amb l’ocupacion d’una part del territòri armèni.