Lo cònsol màger de Tolosa, Jean-Luc Moudenc, a mandada una letra de felicitacion a Danís Chapduelh per son adaptacion occitana del jòc vidèo Dordogne e se regaudís de la mesa en valor de la lenga occitana sus un supòrt inedit.

A mai, Moudenc desira un bon succès al jòc, que lo considèra “fòrça poetic” per tal que faga entendre l’occitan “dins lo Mond entièr”.

Dordogne es paregut per PC, Nintendo Switch, Playstation e Xbox e son accion se situa en Peiregòrd. Es en occitan, tant per l’interfàcia coma pels dialògs. L’istòria l’a creada lo dessenhaire Cédric Babouche, e conta lo viatge de Mimi, una femna d’aperaquí 30 ans, que va desmainatjar l’ostal de sa mairegrand que ven de morir. Abans de quitar lo Mond, la grand li aviá mandada una letra ont li disiá: “Te cal venir voidar mon ostal quand serai partida, e descobriràs perqué en venent”. Lo jòc es de mistèris e d’enigmas. Mimi deurà resòlver de copacaps e d’enigmas que li recordaràn son enfança, e serà remandada al temps de sos dètz ans.

Lo jòc es desvolopat per Un Je-ne-sais-quoi e Umanimation, e l’a editat Focus Entertainment. L’interfàcia e los dialògs en occitan los a traduches Danís Chapduelh, e la còla de doblatge l’a dirigida Laurent Labadie. I aurà de versions en francés, anglés, japonés. L’occitan a agut un tractament particular gràcias a la fòrta volontat de Cédric Babouche.

La version occitana a agut lo sosten financièr de l'ÒPLO e doncas de la region Nòva Aquitània.

Es pas lo primièr còp qu’un elegit se regaudís d’un bon trabalh en lenga nòstra. En febrièr de 2021, lo cònsol màger de Montpelhièr, Michaël Delafosse, mandèt una letra de felicitacions a Rodin Kaufmann per son trabalh Pantais Clus e sos videoclips.

Ah oké donc oké d'accord. 😅 pic.twitter.com/1Me2ScUIL0

— Tristan Gahús (@TristanGahus) September 18, 2023