Dempuèi lo començament de l’an  escolar, Valonia es immergida dins una intensa polemica a l’entorn de la Guida Evras, un programa d’educacion sus las relacions,  l’afectivitat e la sexualitat que lo parlament de la Federacion Valonia-Brussèlas a decidit de far venir obligatòri pels estudiants de seisena e segonda. Malgrat las sesilhas relativament escassas —doas oras dos còps per an— s’es desencadenada una campanha massissa de desinformacion. Los detractors denóncian una "ipersexualizacion dempuèi l’ensenhament preelementari", en fasent d’afirmacions completament falsas, per exemple en pretendent que s’ensenha la masturbacion als enfants a partir de 5 ans o que se mòstra de filmes pornografics als mainatges a comptar de 9 ans, çò rapòrta Libération.

Uèch escòlas atacadas

Recentament, la situacion a pres una virada inquietanta amb l’aument de peticions,  de vidèos virals e, sustot, l’atac de uèch escòlas. Lo procuraire de Charleroi a confirmat la dobertura d’una enquista per "incendi criminal” e "associacion de malfactors". Lo 17 de setembre, a Brussèlas, una manifestacion amassèt entre 1500 e 2000 personas jos la devisa "Toquetz pas nòstres enfants". La varietat dels participants atraguèt l’atencion: i aviá de membres de l’extrèma drecha, d’ancians Gilets Jaunes, de seguidors de teorias conspiracionistas sus la COVID-19 e una supausada promocion de la pedofilia, e tanben d’integristas catolics e musulmans.

La polemica atenh ara França amb l’ajuda de figuras influentas coma Maxime Nicolle e lo cantador de rap Rohff, qu’afirman d’un biais erronèu que la Guida Evras arriba en França. Aquò a creat una peticion, inicialament adreiçada a Gabriel Attal, qu’ara interpèla la ministra de l’educacion bèlga, Caroline Désir, qu’a reünit aperaquí 18 000 signaturas uèi per uèi.