Dimenge de ser, lo president francés Emmanuel Macron anoncièt lo retirament dels 1500 militars franceses estacionats en Nigèr, en suscitant una satisfaccion apiejada e un sentiment de viure un “moment istoric”. La mobilizacion populara en favor d'aquel retirament es estada intensa.

Maikoul Zodi, president de la coordenacion dels movements populars, soslinhèt que, malgrat la satisfaccion, lor lucha contunhariá fins a la partença del darrièr soldat francés. De lor caire, la junta militara que govèrna ara lo país après lo còp d’estat de julhet a qualificat de “junta francesa” las ancianas autoritats al poder.

Es lo quatren còp en un pauc mai d'un an que las tropas francesas abandonan un país african. Çò que deviá èsser una collaboracion per luchar contra lo jihadisme e lo caos, s'interprèta ara coma un signe de sobeiranetat e d’anticolonialisme.

Lo retirament francés de Nigèr es fòrça simbolic e estrategic se prenèm en compte lo fach que París a ja perdut de basas en Mali, Burkina Faso e Centreafrica, çò que fa venir evidenta la rompedura radicala de las relacions amb aquelas èx-colònias.

Aqueste retirament, umiliant per França, arriba après una situacion insuportabla per las tropas e l’ambaissador francés en Nigèr. Los ponches d’interrogacion pertòcan ara la preséncia russa dins la region e çò que farà lo jihadisme installat en Sahèl.

After months of pressure from military government and anti-French protests, President Macron has order French ambassador and other diplomats to leave Niger. pic.twitter.com/CS9ehGN03p

— DW News (@dwnews) September 26, 2023