Diluns passat, l'activista ecologista Thomas Brail foguèt deslotjat de l’arbre ont s’èra installat en fàcia del Ministèri de la Transicion Ecologica, a París, après 24 jorns de cauma de la fam. Brail protèsta contra la construccion de l'autoestrada A69 entre Tolosa e Castras. L'eveniment foguèt difusat en dirècte pel mèdia Vatika e partejat pel jornalista Hugo Clément, çò rapòrta Huffpost.

 Brail aviá idèa de començar una cauma de la set a partir del diluns seguent. Denóncia l'artificializacion dels sòls e l'abatatge massís d'arbres per la bastison de l'autoestrada. Lo militant aviá ja protestat contra l'abatatge d'arbres en 2019 dins sa vila de Condòm (Tenaresa).

Malgrat sa lassièra e las dolors fisicas, refusa d'abandonar sa causa e crida a suspendre temporàriament las òbras per una mediacion. Critica l'intervencion de las fòrças de l'òrdre e soslinha la perseguida de la mobilizacion. Catòrze caumaires, dont de personalitats, se jonhon a la lucha, çò rapòrta Reporterre.

D'amassadas son previstas per sosténer lor accion e denonciar lo doble discors del govèrn.

Mentretant, lo tribunal administratiu de Tolosa examina la procedura d'urgéncia lançada per d'opausants a l'A69 per arrestar los trabalhs temporàriament. Las òbras realizadas dins una zòna Natura 2000e  afèctan força la fauna.